Pork Pantry
Our consumer pages answer all your questions about pork. 
Also try our mouth-watering   recipes.

SAPPO
About SAPPO
Contact us
Latest news
History
Objectives
Mission and vision
Structure
Why should I join?

Functions
Communication
Promotions
Serological tests
Residue tests
Research
MH gene
Market information

Provincial organisations
KwaZulu Natal PPO
Western Cape PPA
Free State PPA
Transvaal PPA

Pig Study groups
Limpopo PSG
Magaliesburg PSG
Northern Free State PSG
North West PSG
Gauteng PSG

Other role players
Pig Vet Society
Pig Breeders' Society
ARC-AII

Meet our input suppliers

Article archive

Bedryf moet boodskap oor gesonde varkvleis wyd verkondig

Hoewel verbruikers in die verlede nie so baie in die gesondheidswaarde van voedselsoorte belanggestel het nie, is dit deesdae die eerste prioriteit op hulle inkopielys. Die Suid-Afrikaanse varkvleisbedryf kan ‘n voorloper op dié gebied raak as dit verbruikers kan oortuig dat varkvleis gesond en veilig is,” het Vickie de Beer, kosredakteur van die tydskrifte Rooi Rose en Shape, by die algemene jaarvergadering gesê.

De Beer het gesê dat Rooi Rose se gereelde opnames onder lesers toon dat varkvleis ‘n positiewe beeld by verbruikers het maar dat hulle meer van die voedingswaarde daarvan wil weet.

“Verbruikers lees die etikette op verpakkings en hulle wil weet of ‘n produk, byvoorbeeld ‘n verwerkte vleisproduk, gesond is en wat dit bevat.  Verbruikers soek voorts verskeidenheid en gerief en wil meer weet oor gaarmaakmetodes vir varkvleis. Hulle will ook moderne resepte hê,” het sy gesê.

Volgens De Beer is daar die afgelope twee jaar ‘n groter bewustheid onder verbruikers oor varkvleis danksy die varkvleisbedryf se promosie-aksies soos die groot vertoonborde langs paaie en advertensies in verskeie publikasies. “Die moderne verbruiker reis oorsee en het toegang tot internasionale resepteboeke.

“Hulle kry nie noodwendig die verskeidenheid wat oorsee beskikbaar is in Suid-Afrika nie.”

Dieresiektes: Beter samewerking van produsente nodig

Dit is in elke varkprodusent se belang om ten minste aan SAVPO se minimum biosekuriteitvereistes te voldoen, het Hennie Cronjé, voorsitter van die Kaaplandse Varkvleisprodusente-organisasie by die vereniging se algemene jaarvergadering buite Stellenbosch gesê.

“Ons probeer steeds om boere by SAVPO se kompartementaliseringstelsel betrokke te kry om PRRS-vrye plase in die Wes-Kaap te verseker. Die samewerking van produsente is egter teleurstellend, selfs al betaal SAVPO vir die bloedtoetse. Produsente moet onthou dat wanneer daar weer ‘n uitbraak van ‘n siekte soos PRRS is, en hulle plase is nie PRRS-vry gesertifiseer nie, gaan die moeilik wees om die regering te oortuig om kompensasie te betaal,” het Cronjé gesê.

Bedryf moet hande vat om beter slagteropleiding te verseker

Aubrey Martin, ‘n konsultant vir vleismarkte en slaghuise, het by die algemene jaarvergadering van die Kaaplandse Varkvleisprodusente ‘n beroep op alle rolspelers in die vleisbedryf gedoen om hande te vat en ‘n akademie vir slagtersopleiding tot stand te bring. Martin het gesê dat slagters min formele opleiding ontvang en daarom is baie nie behoorlik opgelei nie.

“Baie het ‘n tekort aan bestuurs-, rekenaar-, besigheid- en kommunikasievaardighede. Baie het ook nie genoeg vaardighede om karkasse reg te versnit nie,” het Martin gesê. Hy het daarop gewys dat entoesiastiese slagters en handelspersoneel, wat persoonlik in slaghuise en ander handelspunte met kliënte kommunikeer, baie kan doen om meer vleis te verkoop.

H1N1: Produsente hoef nie onnodig bekommerd te wees

Produsente hoef nie onnodig bekommerd te wees dat siek werkers die H1N1-virus aan hulle kuddes kan oordra nie. “Tot dusver het dit op slegs twee plase in die wêreld gebeur. Dit lyk dus of die risiko laag is,” het dr Peter Evans, SAVPO se gesondheidsbeampte by die jaarvergadering gesê. Dr Evans het aanbeveel dat goeie kommunikasie met werkers kan help om die risiko te verklein. “Vra uit en vind uit. Stuur ‘n werker dokter toe en vind uit of die werker 'n aansteeklike siekte het,” was sy aanbeveling.

Hy het daarop gewys dat sowat 70% van die varkplase in die Wes-Kaap in SAVPO se biosekuriteit-opname wat vroeër vanjaar gedoen is, omheinde eenhede het wat mense en diere verhoed om die eenhede te betree. “Sowat 80% van die eenhede laat egter voertuie deur sonder dat dit ontsmet is terwyl stortfasiliteite ook by slegs sowat 30% van die eenhede bestaan. “Ons is ook bekommerd dat slegs 31% van die produsente aangedui het dat hulle diere by ‘n enkelbron met ‘n hoë gesondheidstatus aankoop,” het hy gesê.

Vertoonbord by Kaapse Waterfront was goeie belegging

Die reuse-vertoonbord by die Kaapse Waterfront waarop smullekker varkvleisgeregte aan vier fronte vertoon word en gereeld vervang word, was ‘n goeie belegging vir die varlvleisbedryf.

Daar is baie instansies wat nou in dié gesogte ruimte belangstel met die oog op die komende sokkerwêreldbeker.

SAVPO het dit egter betyds tot na die sokkerwêreldbeker bespreek, het Marieta Human, SAVPO se promosiekoördineerder by die vergadering gesê.

Human het gesê dat promosies die afgelope jaar voor die wind in die Wes-Kaap verloop het met advertensies wat elke maand in Die Burger en The Cape Argus verskyn, 'n groot verbruikerskompetisie wat tans in sowel die Wes-Kaap as Gauteng plaasvind, en ‘n suksesvolle sjef-kompetisie wat saam met ‘n opleidingsinstansie in Kaapstad aangebied is. “Ons suksesvolle township-opleiding sorg ook dat meer kundige mense oor varkvleis in die vleisbedryf beland,” het sy gesê.

Veediefstalkomitee doen goeie werk

Die Veediefstalkomitee in die Wes-Kaap doen goeie werk en boere kan gerus wees dat vele kundiges, staatsdepartemente en ander oganisasies insette lewer, het Mike Jack by die vergadering gesê.

Jack het gesê dat die Veediefstalkomitee weer ‘n beroep op produsente gedoen het om hulle diere ingevolge die Wet op die Identifikasie van Diere te merk.

Vrywillige heffing verhoog

Die Kaaplandse Varkvleisprodusente-organisasie het besluit om sy vrywillige heffing van R3.60 per karkas tot R4 te verhoog. Pieter de Jager, nuwe vise-voorsitter van die vereniging, (foto) het gesê die vrywillige heffing word hoofsaaklik vir promosiedoeleindes gebruik.

“Die geld het ons byvoorbeeld in staat gestel om advertensies gedurende Junie en Julie in dagblaaie te plaas toe varkkarkasse in die Wes-Kaap opgehoop het.”